Временските промени го шокираат организмот, како да го заштитите здравјето?

Најавената нагла промена на температурите носи ризик по здравјето на граѓаните. Тегобите кои се јавуваат се поизразени кај хронично болните, но не се поштедени ниту здравите лица. Огромните температурни разлики се шок за организмот, предупредуваат лекарите.

Како најчести проблеми се наведуваат: главоболка, напнатост на телото, болки во коските и во зглобовите, малаксаност и несоници. На голем удар се срцево болните и децата кои страдаат најчесто од респираторните заболувања на горните и долни дишни патишта. Зголемен е ризикот и за лицата со висок притисок, пост инфарктни состојби или после прележан мозочен удар.

За да се сочува здравјето лекарите советуваат превентивни мерки како облека според моменталните временски прилики, разновидна исхрана и дополнителен внес на витамини,  хронично болните редовно да ја земаат својата терапија и да бараат медицинска помиш доколку им се влоши состојбата.

Неделата започнува со променливо облачно време и повремени врнежи од дожд. За разлика од претходната недела кога температурите заглавија длабоко под нулата, деновиве ќе се движат до 15 степени.