(2) ОДГОВАРААТ: Соња Дамјановска, Александар Тодоровиќ, Христос Елинидис

Соња Дамјановска, советник

Соња Дамјановска, советник во Советот на општина Гостивар

„Годинава што изминува дефинитивно беше година на промени. Влеговме во еден ритам, магичен круг, следевме актуелности. Постојано имаше неизвесности. Година која ми донесе голем животен предизвик, местото на советник во Советот на општина Гостивар, што воедно е и голема одговорност. На приватен план ќе ја паметам како година во која станав мајка на студент. Како период, потсетник дека љубовта и поддршката од најблиските се од витално значење во тешките моменти“.

„Одамна никој не ме прашал што сакам за новата година, а убаво би ми дошла некоја книга како изненадување под елката. Убавината на новогодишните празници е во магијата на споделувањето среќа, а таа се шири со насмевки и убави зборови, на тоа не треба да штедиме. Би сакала новата година да биде еден нов почеток. Да ја разбудиме емпатијата во нас. Наместо да бараме разлики да ги воочиме сличностите, да и направиме простор на толеранцијата. Да живееме малку порелаксиран живот во кој ќе споделуваме идеи, наместо да ги коментираме дневнополитичките случувања. Да успееме да се справиме со стереотипите, да овозможиме еднакви можности за нашите деца. Среќна и успешна година Ви посакувам!“

Александар Тодоровиќ, КК Гостивар

Александар Тодоровиќ, кошаркар на КК Гостивар

Годината 2017 ќе ја паметам по многу убави работи и на личен и на професионален план. Покрај тоа што го направив најголемиот и најважен чекор во животот се оженив. Оваа година ќе го обележи и моето доаѓање во Гостивар, каде запознав прекрасни луѓе.

Во Новата година посакувам здравје пред се, а останато само ќе си дојде.

Христос Елинидис, музичар

Христос Еленидис – Рус, музичар 

“Јас ќе ја паметам како јубилејна за моите 50 години и учеството во емисијата Никад није касно, за освојувањето на прво место по СМС гласовите. За тоа одговорен виновник беше мојата ќерка Александра која ме пријави во натпреварувањето”.

“Што би сакал да посакам за Нова Година… Тоа е здравје, мир и многу љубов за сите луѓе во светот и нормално за моите најблиски”.