Втор ребаланс на буџетот на Општина Гостивар, сметката блокирана од извршители

На денешната седница на Советот на Општина Гостивар беше изгласан втор ребаланс на општинскиот буџет за 2022-ра година, со што буџетот се зголеми за над 21 милион денари. Сепак, според кажувањата на претставниците од Секторот за финансии, неизвесно е кога сметката на општината, која е блокирана од извршители поради наплата на долгови кон фирми, ќе биде деблокирана.

„Ребалансот се прави поради тоа што ивршители повлекле средства од одредена програма, тие повлекуваат од таму кадешто има средства, а исто така и поради измени во ДДВ“, рекоа од Секторот за финансии.

Реакции стигнаа од советници од советничката група на ДУИ. Лек Далипи побара градоначалникот да присуствува на седниците кога се дискутира за буџетски прашања.

„Градоначалникот да не испочитува со присуство кога се зборува за буџетот, сметката е блокирана, општината тоне во долгови, па редно е да биде присутен“, рече тој.

Неговиот сопартиец Азиз Даути посочи дека за блокираната сметка не треба прстот да се вперува во извршителите.

„Извршителите си ја вршат работата и го наплаќаат долгот кој општината го има кон фирми, не треба да се обвинуваат, туку треба да видиме зошто општината не ги подмирила обврските. Исто така, ме загрижува и што се намалува сумата во делот на социјалната заштита, мислам дека во оваа криза тоа не треба да се прави“, рече советникот.

На седницата беа усвоени и неколку одлуки од урбанизам, извештаи за работата на ЈП за паркинг и зеленило и др