За телефон и репрезентација Таравари летово потрошил околу 100 илјади денари службени пари

Општина Гостивар ја продолжи праксата на објавување на службените трошоци на градоначалникот Арбен Таравари. Последниот извештај содржи податоци за летните месеци јуни, јули и август со вкупна сума од 99.400 денари.
Трошоците за овие месеци се поделени само во две ставки: угостителски услуги во земјата преку надворешни угостителски објекти и сметки за мобилен телефон. За службени ручеци и слични угостителски услуги градоначалникот вкупно потрошил околу 91.500 денари. Највисоката поединечна сметка изнесува 25.400 денари, а најефтината сума е 7.710 денари. За мобилен телефон, Таравари месечно трошел околу 2.500 денари.
Претходно беа објавени трошоците на градоначалникот за периодот од стапувањето на функцијата во ноември лани, до мај годинава чија вкупна сума изнесува 231.886 денари потрошени за хотелски сместувања во странство, авионски билети, дневници, сметки за мобилен телефон, репрезентација.