Забрането е групирање над 4 лица и за бадниковите огнови, инспекциите ќе контролираат

Во очи на православниот празник Бадник, кога традиционално се палат бадникови огнови и се собираат верници на прослава, инспекциите предупредуваат дека се уше е на сила забраната за групирање, како превентивна ковид мерка.

„Како и до сега, така и за вечерва важи забраната за групирање на јавни простори на над повеќе од 4 лица. Во рамки на ова ограничување, значи спаѓа и вечерашното евентуално палење на бадниковите огнови и прослави.“, изјави  претседателката на Инспекцискиот совет, Магдалена Филиповска-Грашкоска.

Таа ги повика граѓаните да ги одбележуваат празниците што престојат во кругот на семејството, што според неа било случај и со Новата година.

„Неколку дена по новогодишните прослави, сакам да се заблагодарам на сите граѓани, на медиумите, на сите инспектори и полициски службеници кои работеа цела новогодишна ноќ и наредните денови за да се обезбеди почитувањето на ковид протоколите и да имаме мирна и безбедна новогодишна ноќ. Пред нас се уште празнични денови , за кои искрено се надеваме дека ќе поминат во најдобар ред, но уште еднаш апелираме до сите граѓани и стопанственици да имаат трпение и да ги почитуваат мерките, да празнуваме одговорно во кругот на семејството, да се воздржиме од прослави и да нема групирања. Надлежните инспекциски служби и во текот на наредните денови ќе спроведуваат интензивни контроли на терен, со цел да се спречи ширењето на вирусот и да се заштити здравјето на граѓаните. Ќе продолжат да работат со полн капацитет и во следниот период, и неселективно и навремено ќе ги санкционираат сите оние кои преку непочитување на протоколите и мерките го загрозуваат јавното здравје и здравјето на граѓаните“, рече Грашкоска.