Зачестени пожари: Не оставајте уклучени грејни тела додека не сте дома

Ниските температури последниве десетина дена ја интензивираа грејната сезона со што се зголемија и ризиците од избувнување на пожари. Најчести причини за пожарите се човечко невнимание, стари и дотраени електрични инсталации, неисправни печки и неисчистени оџаци во куќи и станбени згради.

Во насока на спречување сериозни последици, Секторот за внатрешни работи Тетово апелираше до граѓаните на крајна претпазливост „Да не ги оставаат вклучени грејните тела кога не се присутни во домовите или работните простории, особено греалки, клима уреди или печки на дрва. Ова, посебно се однесува на станбените згради, во кои многу потешко се локализираат пожарите, поради недостиг на потребната опрема во многу од нив и отежнат пристап до објектите, најчесто од градежни или други причини.“, се вели во апелот.

На сопствениците на куќи и на станарите во зградите им се советува да ја проверат исправноста на грејните тела и соодветно да ги исчистат оџаците, но и да не ги преоптоваруваат инсталациите со вклучување на повеќе електрични апарати, оддеднаш.

СВР потсети дека пожарите претставуваат кривично дело „предизвикување на општа опасност“, за кое е  предвидена затворска казна од една до пет години, зависно од околностите и крајните последици.