Заштитен најлон како привремено решение за кровот во „Гоце Делчев“

Привремено ќе се санира кровот во ОУ„Гоце Делчев“ во Гостивар, кој години наназад е во лоша состојба поради што капе вода во училниците при дожд и топење на снег. Локалната самоуправа соопшти дека работите за покривање започнале денес.

„Јужната страна на училишната зграда ќе биде покриена со најлон кој се користи за оранжерии, материјал кој штити од снег, дожд и ветер за период од три години. Покрај јужната страна, која зафаќа површина од околу 1000 квадратни метри, ќе се санираат и оштетените делови на покривот на другите страни од зградата. Воедно ќе се интервенира и на сомнителните точки, од кои се претпоставува дека може да протекува вода, како што се местата каде што поминуваат жиците од громобранот“, информираа од општина Гостивар.

Зафатот го реализираат две фирми кои пројавиле интерес да помогнат без надоместок.

„Со реализација на овој проект кој се очекува да биде завршен неделава, се гарантира дека оваа учебна година учениците ќе ја завршат без проблеми. За трајно решение, наредната пролет ќе се извршат сите тендерски постапки и за време на летниот одмор ќе се изведат работите за изградба на нов покрив. Тоа значи дека од новата учебна година, во ОУ “Гоце Делчев” ќе биде решен клучниот проблем со кој училиштето се соочува последниве години“, најавува локалната власт.