Засилени контроли во Гостивар за носење маски во автомобили, комбиња, автобуси…

Секторот за внатрешни работи Тетово неделава значително ги засили контролните активности кои се однесуваат на користење заштита на лицето во возила, патнички, комбиња и автобуси, а кои континуирано се реализираат неколку месеци наназад. На сите кои не ја почитуваат, односно не се придржуваат на владината Уредба со која се регулира задолжителното носење на заштита на лицето, на начин и место утврдени со истата, им се изготвуваат поднесоци.

Од стапувањето во сила на оваа Уредба, изговени се вкупно 5.276 поднесоци за некористење заштита, од кои 3.676 на тетовското и 1.600 на поширокото гостиварско подрачје.

„Секторот за внатрешни работи Тетово им укажува на возачите и другиот работен персонал во комбиња или автобуси стрикно да се придржуваат на Уредбата за која станува збор и да не превезуваат лица без заштитни маски, но и повеќе од максимално дозволениот број на патници. Зашто, во спротивно возилата ќе бидат исклучувани од сообраќај и ќе им се изготват поднесоци, не само на физички, туку и на правните лица.“, соопшти портпаролот на СВР, Марјан Јосифоски.