Збогум „буба“ – престанува производството на култниот автомобил

Крајот на производството на „бубата“, свечено ќе биде означен на церемонија, која денес ја организира компанијата Фолксваген, во својата фабрика во Пуебла, Мексико.  Последниот, 5.961. примерок од верзијата „фајнл едишн“ ќе заврши како музејски експонат, да сведочи за големината на малиот култен автомобил.

Првата „буба“ е произведена 1938 година и автомобилот беше дел од најмрачниот период на Германија, создаден како „народен автомобил“. По војната стана симбол на економската ренесанса на Германија и на просперитетот на растечката средна класа. Популарноста на автомобилот порасна насекаде во светот, по успешните филмови на Disney, за автомобилот со име Herbie.

Крајот на „бубата“, Фолксваген го најави лани, а одлуката била донесена поради континуираниот пад на продажбата на возилото. За разлика од годините на популарноста, кога годишно се продавале по 420 илјади коли од овој тип, продажбата во последните паднала на 15 илјади.