Жени претприемачки од Гостивар се едуцираа за креирање бизнис идеи и иновации

Како да се справат со најчестите проблеми во водењето на бизнис, кои се начините и можностите за креирање бизнис идеи и иновации, на кои аспекти најмногу да обрнат внимание за да успеат во бизнис светот. Ова беа темите опфатени со обуката што денес се одржа во Гостивар, наменета за жени претприемачки под наслов „Решавање проблеми и креирање бизнис идеи и иновации“.

„Темата е доста интересна и комплексна, преку обуката се обидувам да ги пренесам моите знаења и искуства на жените претприемачки да бидат способни да ги детектираат проблемите како во општеството така и во бизнисот и да можат да направат соодветни иновации и решенија кои ќе одговорат на тие потреби и проблеми. Од аспект на водење бизнис во претприемништвото чести се проблемите со управувањето со финансиите и кај новоосновани бизниси чест проблем е што самиот бизнис се поставува на погрешна основа, односно очекувањата се преценети на почетокот, па бизнсот се развива во погрешна насока. Ние ќе се обидеме да ги едуцираме жените на обуката како да ги надминуваат ваквите пречки и проблеми“, кажа предавачот Сергеј Зафировски, менаџер и експерт за претприемаштво.

Обуката во Гостивар се спроведе како дел од проектот за “Подобрување и унапредување на положбата на женското претприемништво” на Националната платформа за женско претприемништво.

Идејата за проектот произлегува од фактот дека инвестирањето во жени е едно од најефикасните средства за зголемување на еднаквоста и промовирање на инклузивен и одржлив економски раст, нагласија организаторите.