„Екс-Ју“ регионот се‘ уште без шампион во АБА лигата, Партизан-Црвена звезда 2:2

Новиот шампион во Јадранската АБА лига ќе го решава „мајсторка“! Кошаркарите на Црвена звезда по вторпат го искористија домашниот терен во салата „Александар Николиќ“ совладувајќи го Партизан со резултат 68:56 во меч во кој речиси цело време водеа. Тензичната атмосфера на трибините кулминираше пред самиот крај кога настана хаос, навивачите се степаа и низа предмети летаа на подот. Судиите најпрвин побараа да се испразни трибината, но натпреварот сепак се одигра до крај. Со овој триумф избраниците на Душко Ивановиќ изедначија во серијата на 2-2 во победи и ја спасија втората „меч-топка“ што ја имаше Партизан како гостин.

Црвена звезда ја предводеше Факундо Кампако со 21 поен со по четири скока и асистенции, Огњен Добриќ постигна 14 со седум скока, а Петрушев имаше 10. Во редовите на Партизан најдобар беше Ексум со 12 поени и 10 скока, а двоцифрени беа Пантер и Аврмаовиќ со по 10 поен.

Одлуката за новиот шампион на Јадранот ќе биде донесена в четврток во „Штарк Арена“ од 20 часот, а домаќин ќе биде тимот на Жељко Обрадовиќ.