Општина Гостивар: Снегот се чисти, возилата да не се паркираат на места каде се попречува работата

Во Гостивар денес паднаа првите снежни врнежи сезонава. Од локалната самоуправа вечерва соопштија дека екипи се излезени на терен и работат на расчистување на улиците и патиштата и упатија апел работите да не се попречуваат.

„Со почетокот на снежните врнежи, Општина Гостивар, односно фирмата договорена за одржување на патиштата во зимскиот период е на терен и го чисти снегот. Се молат граѓаните да избегнуваат непотребни движења, како и да не ги паркираат своите возила надвор од местата наменети за таа намена, за да се обезбеди непречено одвивање на работите. Ви благодариме за разбирањето!“, стои во општинското известување.

ЦУК вечерва пренесе дека од ЈП за одржување и заштита на магистралните и регионалните патишта замолуваат  учесниците во сообраќајот кои не користат зимски гуми (што е законска обврска од 15.11.2023 година) да го ослободат патот по кој се движат како не би преставувале пречка за останатите учесници во сообраќајот.

„Со самата постапка, на екипите на Македонијапат ќе им овозможат полесна и посигурна интервенција на патиштата со цел за нормално одвивање на сообраќајот. Ова посебно се однесува за планинските премини и за правците за кој имаме издадено известување за забрани за сообраќај за тешки товарни возила.“, се наведува во соопштението.