На подрачјето на општина Врапчиште ќе се прска против комарци

Општина Врапчиште распиша тендер за фирма која ќе спроведе дезинсекција на територијата на општината. Рокот за пријавување на заинтересираните фирми трае до понеделник, по што ќе следува постапката за избор на најповолниот понудувач.

Од локалната самоуправа на Врапчиште велат дека сите тендерски процедури ќе се завршат за две до три недели, кога и ќе се изврши прскањето против комарци и други штетни инсекти. За дезинсекција, општината ќе издвои 200 илјади денари од буџетот.

Прскањето против комарци е законска обврска на општините, со цел да се спречи размножување на ларвите, да се намали бројот на комарци и ризикот од појава на болести што ги пренесуваат овие инсекти.

Ризични места кои се сметаат за потенцијални легла, најповолни за развој и размножување на инсектите, опфаќаат локации кадешто има депонии, неисчистени канали, поплавени подрачја и слично.