Уписи: Каде ќе учат гостиварските полуматуранти?

Учениците кои завршија основно образование, одлучуваат каде ќе го продолжат школувањето. Денес и утре се спроведува првото пријавување од јунскиот уписен рок во средните училишта. Гостиварските полуматуранти на располагање имаат четири јавни средни школи во кои денес можеа да се видат растрчани ученици и родители, пополнување на документи, консултации со уписните комисии.

Според конкурсот отворени се места за прием на 1.904 ученици, но бројот секако ќе биде далеку помал со оглед на вкупната бројка на полуматуранти.

Од училиштата велат дека главно се задоволни од првиот уписен ден, а очекуваат нови пријави и утре. Тоа го потврдија и во средното техничко училиште од каде оценија дека во првиот уписен ден одредени смерови ги исполниле очекувањата, а утре, на вториот уписен ден очекуваат поголем интерес.

Во економското и гимназијата минимумот за влез е 60 бодови.

„Во нашето училиште може да се запишат ученици со минимум 60 бодови и тој праг останува и за второто пријавување. Мислам дека определбата за нашето училиште е сосема на место, наставата се одвива на ниво со секогаш подготвени професори да им го пренесат знаењето на учениците и им нудиме можности за учество во проекти кадешто секој од нив може да се пронајде“, рече директорот на еконоското училиште во Гостивар, Тони Ефремоски.

„Интересот за упис во средното медицинско училиште и оваа година е доста голем, како и претходните. Критериумите за упис се највисоки, осносно се запишуваат ученици со најголем број на поени. Очекуваме доста пријави и утре.“, рече Горица Војноска, професор во средно медицинско училиште која беше дел од уписна комисија.

Резултатите ќе бидат објавени во среда. Според искуството од минатите години, по првиот рок од уписите, остануваат слободни места во сите гостиварски училишта. Следното пријавување во јунскиот рок е за десет дена.