Доделени признанија за 10 средношколци од Гостивар

Десетина гостиварски средношколци, ги презентираа веб страните што ги изработуваа изминатите три месеци во рамки на проектот TechUP. На завршниот настан, во просториите на Општина Гостивар, на учесниците им беа доделени признанија како потврда за успешно реализирање на активностите. Во склоп на проектот, средношколците имаа можност да ги научат основите на компјутерското кодирање на веб страна и дизајнираа свои сајтови.

„Целта беше преку ова искуство, младите, а посебно девојките, да ги поттикнеме да го продолжат образованието во областа на компјутерските науки. Веруваме дека на овој начин ќе им ги зголемиме и шансите за вработување“, рекоа координаторите на проектот.

Со активностите беа опфатени средношколци од сите националности, а предавањата се одржуваа на три јазици: македонски, албански и англиски.

Проектот TechUP се реализира од страна на Платформа за Зајакнување на Младите, а  финансиски е поддржан од USAID и Општина Гостивар.