Пожарникарите во Гостивар годинава гаснеле над 260 пожари

Во текот на оваа година, Противпожарната единица во Гостивар интервенирала на 263 пожари. Една четвртина од нив, биле пожари од поголем обем и со повисок ризик. Споредено со претходните години, вкупната бројка на пожари во гостиварскиот регион е намалена.

-Сметаме дека тоа се должи на едукацијата на граѓаните и постојаните апели за внимателност. Се подигна свеста во однос на употреба на поквалитетни грејни тела, продолжни кабли и слично, вели командирот на Територијалната Противпожарна единица во Гостивар, Томе Василески.

Пожарникарите изминативе денови имале неколку интервенции на поголеми пожари на отворено. Иако тие не се карактеристични за зимскиот период од годината, сепак сувото време придонело за нивна појава и ширење.

Покрај овие, регистрирани се и повеќе пожари предизвикани од неисчистени оџаци како и од нестручно изведени надградби во колективни згради.

Во номеври и декември Противпожарната единица се ангажирала во гаснење на 30-тина пожари на објекти, на отворен простор, оџаци, трафостаници и возила.