Во Гостивар одбележани 75 години од стрелањето на активистите од НОБ

Пред спомен плочата близу црквата на градскиот плоштад во Гостивар, денес беа одбележани 75 години од стрелањето на шестмината активисти од Народноослободителната борба. Настанот го организираше Општинскиот одбор на Сојузот на борци.

„Во услови кога привршуваа завршните акции за конечното ослободување на Македонија и кога над хоризонтот се наѕираше новата зора и слободата, окупаторските власти преминаа на пресметка и репресалии со сите напредни и прогресивни сили кои се бореа за новото, напредното, за слобода и прогрес. На 10-ти номеври 1944 година во предвечерието на конечното ослободување на Гостивар, овде во црковниот храм тогаш „Свети Сава“, денес „Пресвета Богородица“ група балистички платеници, откако ги фатиле и брутално ги претепале пред очите на јавноста ги стрелале шестмината активисти. Временската дистанца не ја намалува болката кон нив, но уште посилна ја чини благодарноста за нивната жртва“, рече во своето обраќање Радислав Ѓиноски, претседател на Сојуз на борци-Гостивар

Стрелани биле: Васил Пејчиноски (Долна Бањица), Израил Зафироски (Долна Бањица), Маринко Ѓорѓиески (Долна Бањица), Сократ Павловски (Гостивар), Павле Петревски (Балиндол) и Киро Ристовски-Дрнц (Тетово).

На спомен плочата поставена во нивна чест беше положено цвеќе, а присутните им одадоа почит и со едноминутно молчење.