Хит мезе – шарени компир бомбици

Компирот во нашата кујна е речиси секојдневно присутен, најчесто печен, пржен или подготвен како пире. Ако сакате да пробате поинаков начин, може да го искористите овој рецепт за шарени компир бомбици, кои се навистина превкусно мезе.

Состојки:

1 кг. компир
1 јајце
1 лажица сол
100 гр. кашкавал
100 гр. мисиркина шунка
2 лажици млеко
20 гр. путер
неколку перца од млад кромид

за похување:

1 јајце
2 лажици млеко
лебни трошки

Подготовка: Најпрво сварете го компирот, излупете го и додека е се уште врел испасирајте го. Кашкавалот, шунката и перцата од кромид исецкајте ги на ситни коцки. Додадете го путерот, сол, млекото и промешајте. Кога малку ќе излади додадете го јајцето и сецканите шунка, кашкавал и листови од кромид. Промешајте убаво за да се соедини смесата. Од оваа смеса направете топчиња со величина по ваша желба. За похување изматете го јајцето со две лажици млеко, па топчињата натопувајте ги прво во јајцето, потоа во презлата и пржете во подлабока тава со загреано масло.