Отворено во понеделник, од вторник не функционира лизгалиштето во Гостивар

Лизгалиштето во Гостивар кое беше свечено пуштено во употреба на 6 јануари, функционираше само на денот на отворањето. Вчера и денес (вторник и среда) лизгалиштето не може да се користи. Голем број на дечиња со родителите доаѓаат, но нивните желби да застанат на лизгалки на мразот остануваат попусти.  Од одговорните лица за одржување кои ги затекнавме на лизгалиштето објаснија дека се работи за некаков дефект на системот, поради што не се создава мраз на површината. Ја известиле фирмата која го монтирала лизгалиштето, но до овој момен никој не реагирал да го поправи дефектот.

„Доаѓаме по два пати на ден, сакаат децата да се лизгаат, но за џабе. Вчера претпладне ни рекоа да дојдеме вечер дека ќе се среди работата, кога се вративме немаше никој. Денеска, пак дојдовме,  ни велат дека мразот се топи и повторно ништо од лизгањето“, се пожалија посетители кои ги сретнавме на лизгалиштето.

Веста за новото лизгалиште во Гостивар, ги израдува гостиварци, но за кратко. Додека не се среди дефектот, граѓаните ќе немаат привилегија да ги си ги пробаат лизгачките вештини.

Инаку, лизгалиштето е проект на Агенцијата за спорт и млади, со логистичка поддршка на Општина Гостивар.