Вечерва православните христијани чекаат Стара нова година, утре е Василица

Според Јулијанскиот календар вечерва на полноќ настапува Православната нова година или Стара нова, како што е наречена меѓу народот. Традицијата да се слави овој празник се негува во Македонија, Србија, Русија, Црна Гора, Белорусија, Украина, Ерусалим, а постои и во некои германски кантони во Швајцарија, како и во некои делови на Шкотска.

Утре, православните верници ги празнуваат Обрезание Господово и Свети Василиј Велики или Василици. По тој повод во храмовите се служи света Василиева литургија.

Стара нова година и Василица традиционално со низа обичаи се прославуваат во Гостивар и гостиварско. Најрадосни и највозбудени се децата кои ги негуваат старинските обичаи врзани за Василица. Со дренови гранчиња одат од врата до врата, тропаат и пеат василичарски песни, а домаќините пак ги даруваат. Според обичаите, слично како за Бадник, за Василица семејството се собира на трпеза и се крши погача или пита со паричка. Симболиката на паричката е иста, односно се верува дека оној што ќе му падне ќе има среќна и бериќетна година.