Навалица: За пет дена, 140 гостиварци се пријавиле за грантови за отворање бизнис

Во Гостивар има голем интерес за користење на грантовите што ги доделува државата  за отворање на сопствен бизнис.

За пет дена, во Центарот за вработување во Гостивар се пријавиле дури 140 граѓани, кои сакаат да користат неповратни средства за да разработат своја фирма. Се работи за суми од 5 до 10.000 евра.

„Интересот е навистина голем, имаме над 140 апликации до сега. Според бројот на невработени, за Гостивар следуваат околу 6,80% од целокупната сума од Програмата, што значи дека 80 до 85 кандидати ќе бидат прифатени да добијат грантови“, вели   Хисен Амзаи, раководител на Центар за вработување во Гостивар.

Сите оние кои ќе добијат ваков тип на помош, имаат обврска да ја задржат фирмата активна најмалку две години. Во спротивно, ќе мора да вратат од 60 до 80% од парите. Меѓу пријавените до сега, има за најразлични дејности, од лекарски ординации, адвокатски канцеларии, занаетчиски работилници, фрезери и друго.

Минатата година, во гостиварскиот регион грантови за сопствен бизнис добиле 105 лица.