Допрва ќе се одлучува дали ќе има целосен карантин за првомајскиот викенд

Во петок е 1-ви мај и според Законот за празници, неработен ден за сите граѓани. Дали споениот викенд ќе донесе и целосен карантин, се’ уште не се знае. Одлуката ќе биде донесена деновиве, врз основа на оценката на надлежните дали и колку граѓаните ги почитуваат мерките и препораките. Ова го најави министерот за здравство, Венко Филипче.

„Ќе следиме какво ќе биде однесувањето на граѓаните деновиве, дали се почитуваат тие мерки за задолжителна дистанца, носење на маските кога не може да се одржи растојание и врз основа на тоа ќе донесеме одлука како ќе биде организиран следниот викенд“, изјави министерот.

Најдолгиот полициски час беше за велигденските празнувања и траеше траеше 85 часа.

Филипче, исто така најави дека ќе бара од Владата, казнувањето за неносење заштитна опрема на лицето да почне порано, уште на почетокот на неделава, а не од први мај, како што претходно беше предвидено, затоа што многу од граѓаните не ја почитуваат мерката и има групирања.