Механизација работи на Русино, на терен се булдожер, камиони, цистерни…

Градежна механизација од попладнево работи на гаснење на опожарената депонија Русино. Фирмата е ангажирана од страна на гостиварското подрачно одделение на Дирекцијата за заштита и спасување, на барање на општината. Со оглед на големата површина на теренот и зафатеноста на отпадот, во функција се ставени повеќе градежни машини, ровокопач, булдожер и други, и исто толку камиони со земја и цистерни.

Според првичните проценки од Дирекцијата, механизацијата ќе треба да работи четири до пет дена за да може да ја санира состојбата на Русино.

Како што веќе пишувавме, вчеравечер Гостивар беше обвиткан во чад и смрдеа од депонијата. Според пријавата во полицијата, пожари избувнале на три места во Русино. Градоначалникот Таравари на прес денес изрази сомнеж дека се работи за намерно палење.