Опаѓа бројот на новородени во Гостивар, годинава 30-тина бебиња помалку од лани

Статистиката од гинеколошко-акушерското одделение во болницата „Д-р Ферид Мурад“ во Гостивар покажува пад на породувањата. Од почетокот на оваа година, заклучно 24 август родени се вкупно 399 бебиња. Истиот период во 2019-та имало 427 новороденчиња, што значи дека бројката опаднала за 28.

Помалиот број на раѓања, не се поврзува со ковид пандемијата, туку со трендот на намалување на наталитетот кој трае години наназад. Причините се гледаат во иселувањето и променетите состојби во семејството. Значителен дел од младата популација заминува во странство, додека оние кои го градат животот во родното место, се‘ потешко се решаваат да имаат повеќе деца.

Трендот на иселување на младите се потврдува и преку податоците за новородени бебиња запишани во матичната книга во Гостивар, со место на раѓање во странски држави. Минатата година во одделението за водење на матична евиденција во Гостивар биле запишани 1.103 бебиња. Од нив, над 450 се родиле во странство од наши граѓани, коишто потоа ги пријавиле во овдешната матична служба.