МЗ побарало да им се дадат картички на вработените на инфективно во Гостивар кои најавија штрајк

По реакциите на вработените на Инфективното одделение во Гостивар дека останале без домашни платежни картички и најавите за штрајк, Министерството за здравство се заложи да ги добијат. Од Министерството информираат дека побарале од Фондот за здравствено осигурување и Генералниот секретаријат во Владата да им се дадат домашни платежни картички на здравствените работници од инфективното одделение во гостиварската болница за месеците март и април.

Тимот на инфективно, пред неколку дена јавно изрази револт и разочараност што не им се дадени  картички, кои Владата ги вети за медицинарите вклучени во борбата против коронавирусот. Тие реагираа дека секојдневно се во првата борбена линија во лекувањето на пациентите со ковид. Работата е стресна, исцрпувачка и ризична, а останале без тоа што им било ветено како здравствени работници.

На Инфективното одделение во болницата во Гостивар од март до август биле згрижени вкупно 168 пациенти со ковид, со просек од 10 дена хоспитализација. Одделението брои 31 вработен.