Почина познатиот српски фолкер Џеј Рамадановски

Во 56-тата година од животот денес почина познатиот српски фолк пејач Џеј Рамадановски. Според пишувањето на српските медиуми, на фолкерот нагло му се слошило во неговиот дом, каде бил во изолација поради коронавирус. Брзата помош пристигнала и интервенирала, со обиди за реанимација, но и покрај напорите медицинарите не успеале да го спасат.

Џеј страдал од срцево заболување и пред неколку години имал операција на срцето.

Рамадановски потекнува од ромско семејство од македонскиот град Ресен. Детството го поминал во Белград со својата баба по мајка. Дел од младоста ја поминал во воспитно поправен дом за малолетници поради малолетничка деликвенција, а таму го изучил авто-лакерскиот занает. По одслужувањето на воениот рок, кратко време работел во фабриката за трактори и комбајни Змај. Кариерата во музиката ја започнал како пејач на локални и индивидуални ромски веселби, кога неговата дарба ја воочила Марина Туцаковиќ.

Својата популарност ја стекнал кон крајот на 80-тите години на 20 век, главно на просториите на Југославија и Србија. Врвот на популарноста го достигна на почетокот на 90-тите години. Остави бројни хитови во фолк музиката.

фото: фан страна фејсбук/Џеј Рамадановски