За десетина дена во Гостивар и Тетово запленети над 56.000 петарди и ракети

Полицијата периодов ги засили контролните активности поврзани со навремено откривање и спречување продажба и употреба на петарди и други пиротехнички средства. Оваа и минатата недела на полошкото подрачје запленети се над 56 илјади парчиња пиротехнички средства, најмногу петарди и ракети.

Надлежните апелираат и предупредуваат на опасноста од користење на пиротехника, но како и секој предновогодишен период, и годинава оваа појава не изостанува.

„На трговците, родителите и децата им се укажува дека продавањето, купувањето и активирањето на петарди на јавни места, на улица, во дворови, влезови на станбени згради и слично, претставува прекршок, за кој согласно член 31 од Законот за прекршоци против јавниот ред и мир предвидена е парична глоба од 200 до 500 евра во денарска противвредност. Нивното набавување и дистрибуирање на пазарот во поголеми количини,пак, спротивно е на Кривичниот законик и за тоа дело е предвидена казна затвор од најмалку пет години.“, велат од полицијата.