Подрачјето на Гостивар стигна до 36 активно заразени со коронавирус

Последниот период се бележат нови случаи на коронавирус во гостиварскиот регион. Само изминатите два дена, Министерството за здравство потврди вкупно 14 новозаразени. Со ова, бројката на активно позитивни на подрачјето на Гостивар стигна до 36. Според податоците од Институтот за јавно здравје, по број на активно болни предничат Скопје со 171 и Тетово до 135, по нив следува Куманово со 59, а Гостивар е на четврто место.

Министерот за здравство Венко Филипче вчера изјави дека очигледно е оти нема да запре трендот на појава на нови соеви на вирусот. Според него, многу веројатно е дека делта сојот нема да биде последниот сој на овој вирус.

Во зависност од моменталната состојба, здравствените власти ќе разговараат за евентуални рестриктивни мерки, прво насочени кон оние кои не се вакцинирани. Постои можност да се оди по примерот на некои други земји во делот на ограничување на влезот во затворени простории, поточно, да се бара задолжителна потврда за вакцинација.

– Овие мерки ќе важат за тие кои не се вакцинирани. Има мерки кои веројатно ќе продолжат да важат и понатаму, тоа се маските во затворен простор. Точно е дека можат да се заразат и луѓе кои се вакцинирани, меѓутоа вакцината штити од тешка форма на болеста и сериозно го намалува ризикот од смртен исход и тоа е суштината. Многу веројатно е дека ќе дојде и некоја следна мутација, а тоа не значи дека ние ќе живееме и треба да живееме со рестрикции, рече Филипче.