Таравари: И основните училишта во Гостивар треба да почнат со онлајн настава

По официјалната препорака од Комисијата за заразни болести, средните училишта во Гостивар и Тетово да ја започнат новата учебна година онлајн, а основните со физичко присуство, Gostivarpress.mk побара став од градоначалникот на Општина Гостивар, Арбен Таравари.

„Ние и претходно го кажавме нашиот став, дека и основните и средните училишта во Гостивар треба да започнат со учебната година подоцна, додека се стабилизираат бројките, бидејќи децата се најголеми трансмитери, пренесувачи на вирусот. Ако пак, веќе Владата носи одлука средните училишта да започнат онлајн, така би требало да биде и за основните. Како општина немаме друго, освен да ги почитуваме одлуките, и во Гостивар наставата ќе се одвива согласно владините одлуки. Но, наше мислење е дека и основните и средните училишта треба да почнат онлајн 2-3 недели, па потоа со физичко присуство.“, вели градоначалникот.

На прашањето„ Дали бил консултиран околу ова прашање од страна на Министерството за здравство или Комисијата за заразни болести?“, Таравари одговори:

„Не, немало никаква комуникација, со оглед дека сме од опозициска партија не‘ сметаат за најголеми непријатели. Никогаш не сме имале никаква комуникација“.