По четврти пат „Ги запознаваме ретките болести“ – Gostivarpress.mk со поддршка на проектот

Од денес почнува четвртата сезона од проектот Ги запознаваме ретките болести, изработен од Гордана Лолеска, Супер радио, и здруженијата „Ретко е да си редок“ и „Живот со предизвици“.

Подготвени се 28 текстови за веб портали, 28 аудио клипови и 28 видео клипови на македонски и на албански јазик. Како новитет годинава е и официјалната веб страница на кампањата, на која се поместени сите податоци и материјали од претходните кампањи.

Целта е подигање на гласот за проблемите со кои се соочуваат лицата со ретки болести, но и нивните семејства.

-Во месецот со најмалку дена во годината, во месецот кој пациентите со ретки болести го викаат „свој“, месецот кој е редок по своите ретки 28 дена, и оваа година ќе се обидеме поблиску да ве запознаеме со ретките болести. Оваа година за Денот на ретките болести ги повикуваме сите да и помогнат на заедницата за ретки болести да се обедини со ланец светла низ целиот свет. Како и секоја година, така оваа се приклучуваме кон глобалниот повик на ЕУРОРДИС за осветлување на локални и национални згради и споменици, велат организаторите на проектот.

Проектот стартуваше во 2019 година и е од информативно-едукативен карактер. Во неговата реализација се вклучени афирмирани професори и доктори од целата држава.

Gostivarpress.mk медиумски го поддржува проектот и секој ден во текот на февруари ќе објавува по еден од предвидените текстови за ретките болести.