Ангелов: Реконструкција на водоводната мрежа во Гостивар – еден од најважните проекти

Носителот на листата за членови на Советот на општина Гостивар од СДСМ, Зоран Ангелов, во придружба на кандидатите за советници утрово ги претставија планираните мерки и проекти во програмата од областа на зачувување на чиста животна средина и вода за пиење.

„Ќе обезбедиме чиста и здрава вода за пиење и чист воздух, бидејќи тие се клучни за нашето здравје, а за нас ништо не е поважно од здравјето на граѓаните. Граѓаните се јасни и сериозни во своите барања, а ние одговорно го слушаме и го разбираме крикот за чиста животна средина.  Создадовме план и проекти за зголемен капацитет и за професионална услуга на јавното комунално претпријатие, преку намалени трошоци за граѓаните. Се обврзуваме постојано и навремено да ги чистиме депониите и каналите, ќе вложиме во колекторски систем, пречистителни станици за отпадни води, регионални фабрики за третман на цврст комунален отпад и во енергетско – ефикасни објекти. Еден од најважните проекти ќе биде реконструкција на водоводната мрежа, бидејќи како што знаеме сите, водоводната инсталација е постара од 60 години, при што се јавува неопходна потреба од потполна замена на старата секундарна водоводна мрежа, замена на азбестните цевки за пренос на вода до домаќинствата кои кај нас се се уште во употреба, а Европската Унија ги забрани уште во 2005 година бидејќи се штетни по здравјето на граѓаните. Ќе обезбедиме намалување на загубите во водоснабдителниот систем и подобрување на притисокот на водата. Ќе поставиме мерна станица за аерозагадување, која не постои во Гостивар, а по чие поставување ќе биде позната аеро-загаденоста и со тоа ќе се преземаат мерки за нејзиното намалување.“, рече Ангелов.

На прес конференцијата што се одржа покрај Кејот на Вардар, носителот на советничката листа од СДСМ потенцираше дека Гостивар особено заслужува да има чиста животна средина, како град со многу природни убавини: „Ние гостиварчани, како граѓани од првиот град на Вардар, со овие природни убавини околу нас, заслужуваме да дишеме чист воздух и да пиеме чиста вода. Заслужуваме власт која ќе ни обезбеди чиста и здрава вода за пиење. Заслужуваме да живееме во средина во која не летаат најлонски кеси при секој ветер и во која изворите не се загадени од купишта расфрлано ѓубре. Не заслужуваме природа во која сите реки, од Вардар до најмалата притока, се загадени. Не заслужуваме да живееме во средина во која на секој чекор има по една дива депонија“.