„Анти коцкање“ во Гостивар: Коцкањето е лавиринт во којшто лесно може да се заглави, итно да се донесе нов закон

Импровозиран лавиринт којшто претставува казино, со пишани пораки за штетноста од коцкањето, слики и видеа коишо ја прикажуваат мрачната страна на овој порок, денес беше поставен на плоштадот во Гостивар. Активноста ја спроведе движењето „Анти коцкање“ кое подолго време води кампања за изменување на Законот за игри на среќа, со што казината и обложувалниците би се лоцирале надвор од населените места, а 5% од приходите би се издвојувале за реновирања на училишта, градинки, болници.

„На овој начин искажуваме револт и протестираме поради недонесување на законските измени за игрите на среќа. Исто така, и да извршиме еден вид на притисок, што побрзо да се изгласаат измените. Коцкањето е лавиринт во кој лесно може да се заглави. Како што е денешната симулација на казиното-лавиринт во којшто се претставени слики и видеа што ги покажуваат сите проблеми кои ќе го снајдат човекот, доколку го има овој порок.“, рече Џемал Абдиу, претседател на Движењето „Анти коцкање“.

Абдиу вели дека оствариле средби со сите институции, лидери на политички партии, пратеници, премиерот и претседателот, од каде добивале зборови на поддршка. „Волја постои, но од зборови треба да преминат на дела“, нагласи тој.

Гостиварци дадоа поддршка на кампањата против коцкањето и на воведување поголем ред во работата и функционирањето на казината и обложувалниците. Своите пораки и потписи граѓаните  ги оставаа токму на импровизираното казино на плоштадот.

Според информациите на движењето над 50% од зависниците од коцкање и игри на среќа, размислувале да си го одземат животот, а 15-тина% од нив направиле и  обид за самоубиство.