Апелација Гостивар го одбележа Европскиот ден на граѓанска правда

Апелациониот суд во Гостивар како и секоја година и годинава се приклучи на одбележувањето на Европскиот ден на граѓанска правда, 25 Октомври. Судот беше домаќин на студенти по правни науки кои имаа можност одблиску да се запознаат со работата, организираноста и функционирањето наовој орган, а на нивните прашања одговараше претседателот на судот, Беким Мехмеди.

„Иницијативата за одбележување на Европскиот ден на правдата потекнува од Европскиот совет, со цел отвореност и запознавање на пошироката јавност и на граѓаните, со она што е основна цел на судството, дистрибуција и правораздавање на правда. Ние како Апелационен суд сме биле секогаш вклучени кон оваа иницијатива во рамки на можностите. Мислам дека ова е добар повод, воопшто и за студентите кои ни се овде денес, да ги запознаеме со нашата функционалност, укажувајќи на тоа дека судот е посебен државен орган којшто суди врз основа на Устав и закон и меѓународно ратификувани договори, организиран согласно Законот за судови. Апелациониот суд во Гостивар е надлежен да постапува по жалби на донесени одлуки од првостепените судови во Гостивар, Тетово, Дебар и Кичево, и во случај на судир на надлежности меѓу овие основните судови. Нашиот суд функционира со три оддели и тоа кривичен, граѓански и оддел за судска пракса.“, рече во своето излагање, Мехмеди.

Годинава во гостиварска Апелација има тенденција за зголемување на бројот на предмети, што ќе има дирекно влијание врз ефикасноста, со оглед дека судот се соочува со недостаток на судии. Според статистиката од почетокот на 2022-ра до октомври Апелација решила 2.438 предмети, од вкупно 3.386.