Апелациониот суд во Гостивар денес беше домаќин на студенти по право

Студенти по право денеска беа гости на Апелациониот суд во Гостивар и имаа можност одблиску да се запознаат со работата и функционирањето на оваа институција. Претседателот на Апелација, Шефајет Хајдари, најпрво ги информираше за формирањето, почетоците на судот, организацијата и надлежностите, а потоа одговараше на нивните прашања.

Посетата на младите правници во Апелација се организираше во рамки на одбележувањето на Европскиот ден на граѓанската правда.

„Денешниот датум, 25 октомври се одбележува како Европски ден на граѓанската правда, во сите држави во Европа. Целта е правдата да се доближи до граѓаните и тие да бидат запознаени со начинот на нејзиното спроведување, со тоа се обезбедува широк пристап до правдата за граѓаните и пошироката јавност. Интенцијата е да им се овозможи на граѓаните одблизу да бидат запознаени со нивните основни права од повеќе области, како што е семејно, право на сопственост, наследување, договорно право, авторско право и слично. Задоволство ми е што сме домаќини на овие млади луѓе и имаме можност да ги запознаеме со нашето работење.“, рече Хајдари.

Студентите ги разгледаа и судниците и другите простории, а се распрашуваа за текот на судските постапки, начинот на работа на судиите, можноста за пракса и слично.

Апелациониот суд во Гостивар е формиран во 2007-ма година. Надлежен е да постапува по жалби на донесени одлуки од првостепените судови во Основиот суд Гостивар, Тетово, Дебар и Кичево.