Бејта ја започна кампањата од центарот на Гостивар

Кандидатот за градоначалник на општина Гостивар од Демократската унија за интеграција, Невзат Бејта, претпладнево од центарот на градот ја стартуваше официјалната кампања за Локалните избори 2017. Заедно со тимот од Изборниот штаб и кандидатите од советничката листа разговараа со граѓаните и им ги претставуваа проектите кои се предвидени во нивната изборна програма.

Локацијата за почеток на кампањата од центарот на градот не е избрана случајно туку поради фактот што еден од најголемите проекти кој го предвидуваме е нов градски плоштад, рече Бејта.

„Денес ја започнуваме кампањата од центарот на градот и меѓу граѓаните ја презентираме нашата Програма што треба да ја реализираме 2017-2021 година. Еден од главните проекти во Програмата е и новиот изглед на центарот на градот, односно новиот плоштад, кој ќе биде грандиозен. Со новиот плоштад Гостивар ќе го добие најубавиот центар на градот во нашата држава, во регионот па и пошироко“, изјави кандидатот за градоначалник на Гостивар од ДУИ, Невзат Бејта.

Тој својата денешна агенда ја продолжи на средби со граѓаните од населбите Џамиџит Маало и Ново Маало.