Промоција на “Бесмртно” од Слаѓана Брезовска

Викендов што следи, поточно на 22-ри Октомври (сабота), 19:00 часот во кафе пицерија “Пијано” ќе се одржи промоција на поетската книга “БЕСМРТНО” од авторката Слаѓана Брезовска.

Нашата сограѓанка на претходно објавениот Конкурс од “Клубот на писатели Коста Солев – Рацин” од Велес во конкуренција од над дваесет пријавени необјавени стихозбирки во август годинава ја понесе третата награда. За нејзината втора по ред поетска книга Брезовска вели:

“Ми претставува огромна чест и радост што токму во срцето на Македонија, во родниот град на еден од најголемите поети на нашата држава Коста Солев – Рацин се закитив со првата моја награда за творештво. Датумот кој го одбрав за промоција на мојата книга (22-ри Октомври) е воедно и денот кога за прв пат ја задишав овоземноста. Не само што ќе ја прославувам наградата за стихозбирката туку ќе го прославувам и ЖИВОТОТ кој е впрочем и поднаслов на стихозбирката “БЕСМРТНО”. Ги поканувам сите искрено насмеани гостиварци, љубители на пишаната уметност да ме почестат со своето присуство и да се радуваат заедно со мене. Посакувам секој да може да ја почувствува мојата радост!”

Книгата содржи 50 песни чиј главен мотив се животот и љубовта. На промоцијата ќе присуствуваат повеќе гости од македонската книжевна фела. Во пријатен амбиент ќе се читаат песни од стихозбирката “Бесмртно”.