Бесплатни обуки за ИТ вештини за млади невработени лица, можност и за вработување

Агенцијата за вработување отвори оглас за стекнување вештини од областа на информатичките технологии, наменет за невработени млади лица до 34 години. Обуките се бесплатни, а на крај учесниците ќе добијат соодветен сертификат.

Заинтересираните може да аплицирааат 3 програмски пакети: дигитален маркетинг, графички дизајн и WordPress development. За сите пакети предвидена е практична работа со цел поефикасно совладување на вештините.

Во оваа мерка е предвидено вклучување на 60 невработени млади лица кои ќе добијат можност за надградување на вештините во областа на информатичките технологии заради зголемување на нивната конкурентност и побрза интеграција на пазарот на трудот. За минимум 50% од слушателите кои успешно ќе ја завршат обуката, спроведувачот на обука ќе има обврска да обезбеди вработување кај други работодавачи најдоцна 6 месеци по завршувањето на обуката, а невработеното лице е должно да го прифати вработувањето.

За учество во обука, кандидатот треба да ги исполнува следниве критериуми:

1. Да има завршено средно или високо образование и
2. Да биде на евиденцијата на невработени лица- активен барател на работа

Невработените лица кои веќе еднаш посетиле обука за напредни ИТ вештини можат да учествуваат во обука во друга напредна ИТ вештина, но предност ќе имаат кандидадите кои никогаш не учествувале во обука за напредни ИТ вештини. Обуките од еден модуларен програмски пакет ќе се реализираат во период од четири месеци.

Заинтересираните невработени лица можат да поднесат пријава во Центарот за вработување, секој работен ден од 9 до 14 часот.