Благодарница за скијачот Виктор Петков од Општина Гостивар

За скијачките успеси и постигнатите резултати младиот гостиварец Виктор Петков, доби благодарница од Општина Гостивар. Утрово Виктор беше гостин во кабинетот на градоначалникот Арбен Таравари, кој му ги честиташе постигнувањата и му ја врачи благодарницата.

„За мене како градоначалник навистина е посебно задоволство и гордост кога слушам за вакви успешни млади луѓе. Овој период го поминав со доста успешни млади луѓе од Гостивар: уметници, спортисти, научници и немам зборови, навистина човек не може да биде посреќен отколку кога слуша за такви успеси. Му посакувам на Виктор понатаму да има успешна кариера и се надевам дека ќе реди уште многу добри резултати со кои ние ќе се гордееме“, рече градоначалникот.

Петков истакна дека е задоволен од претходната сезона и најави дека веќе се подготвува за Светското првенство кое ќе се одржи наредната година во февруари.

„Оваа година за мене беше многу успешна. Од 30 натпревари имавме 11 подиуми, што е доста добар успех во Македонија и моментално сум најдобриот скијач. Сега се подготвуваме за Светското првенство кое ќе се одржи во Франција следната година во февруари.“, рече 22 годишниот скијач.

Виктор моментално е студент на Факултетот за физичка култура, спорт и здравје во Скопје, а со скијање се бави од својата трета година.