„Да ги чуваме нашите шуми” , активности во Гостивар на Отсекот за превенција и шумската полиција

Во рамките на кампањата на МВР “Безбедно лето 2023” денеска (8 јули) во Гостивар се реализираа повеќе активности под мотото “Да ги чуваме нашите шуми”. Носители на активностите беа полициски службеници на Отсекот за превенција на СВР Тетово во координација и содејство со гостиварската Шумска полиција.

На неколку пунктови на граѓани-возачи им се делеа наменски изработени флаери од МВР, Шумска полиција и “Национални шуми”, на македонски и албански јазик, со информации за улогата и значењето на шумите како наше заедничко богатство, но и за законските импликации доколку тие бесправно се сечат, палат или уништуваат. Граѓаните, исто така, непосредно беа запознати од полициските службеници – како да постапат и каде да ги пријавуваат криминалните активности во шумите или настанувањето на шумски пожари, информира портпаролот на СВР Тетово, Марјан Јосифоски.

Вакви активности идната недела ќе бидат спроведени и на тетовското подрачје, со цел граѓаните превентивно да се информираат, и да се подигне нивната свест и одговорност за шумите и нивното природно и општествено значење во регионот и пошироко во државата.