Дечињата од гостиварските градинки на гости кај градоначалникот, си ги кажаа своите барања со песна и транспаренти

Весела атмосфера со детски џагор, насмевки и песни утрово владееше во дворот на Општина Гостивар. Дечињата од гостиварските градинки со своите учителки ја посетија општината и беа гости на градоначалникот Арбен Таравари. Најмалите преку транспаренти и песнички ги пренесоа пораките за своите права: на образование, игра, мислење, развивање на таленти, чиста животна околина, здравствена грижа…

Активноста се организираше во склоп на Светската недела на детето.

„Посебна чест ни е што имаме специјални гости во нашата општина, децата од градинките. Тие имаат различни пораки, сите многу убави. На пример, бараат почист град, подобри услови во училиштата и градинките, здравствена заштита…Тоа се практично и барања на сите наши граѓани. Ние се обидовме до сега како општинско раководство да им овозможиме многу подобри услови и да направиме што повеќе детски катчиња и се надевам дека делумно ги исполнивме нивните барања. Но, доброто никогаш нема крај,  можеме да направиме уште и во наредните години ќе работиме на тоа“, кажа градоначалникот.

Традиционално, првата недела од октомври се одбележува како Светска недела на детето, а ЈУДГ ,,Детска Радост“ Гостивар редовно се вклучува со активности. Годинава  програмата содржи и ликовни активности со учество на родителите, ден за традиционални игри, музички хепенинг, како и посета на детска градинка во соседниот град Тетово.

Детската недела оваа година се одбележува под мотото ,,Јас и светот околку мене“.