Денеска „Златната божица“ добива нов сопственик – Франција или Хрватска

После 30 дена репрезентативен фудбал, 63 одиграни натпревари, селекциите на Франција и Хрватска покажаа најмногу и денеска во Москва на стадионот Лужники ќе се борат за најголемата титула во фудбалот Светски првак. И додека на „триколорите“ ова им е второ последователно финале на големи натпреварувања, на „коцкастите“ им е прво воопшто.

Споредбата на повеќето статистички податоци помеѓу Франција и Хрватска, почнувајќи од површината на земјата, бројот на жители, бројот на регистрирани фудбалери, несомнено кажува дека станува збор за сразмер Давид и Голијат.

Жители: Хрватска 4.1 мил – Франција 67 мил
Просечна плата: Хрватска 802 еур – Франција 2.225 еур
Фудбалери: Хрватска 119.000 – Франција 1.770.000
Со БДП од 2.584 милијарди долари фрaнцускиот е 47 пати поголем од хрватскиот од 55 милјарди. Но, за среќа статистиката во фудбалот не е пресудна.

Французите на овој Мундијал имаа убедлив настап. Почнувајќи од групната фаза ги совладаа Австралија, Перу, со Данска изиграа нерешено. Во нокаут фазата, во осминафиналето ја исфрлија Аргентина, во четвртфиналето Уругвај, во полуфиналето Белгија.

Хрватите во групната фаза ги совладаа селекциите на: Нигерија, Аргентина и Исланд. Во нокаут натпреварите во осминафиналето ја исфрлија селекцијата на Данска, во четвртфиналето Русија, во полуфиналето Англија.

Во финалниот натпревар ќе се ловат и индивидуалните награди, а најголемите кандидати се токму во селекциите на Франција и Хрватска. Кандидатите за златната топка се  Килијан Мбапе и Лука Модриќ.

Денеска „Златната божица“ ќе се пресели од рацете на германците во рацете на новиот Светски шампион. Натпреварот започнува во 17 часот.

Во анкетата која ја објавивме во нокаут фазата, на 4 јули покажува дека нашите читатели и тоа како се разбираат во фудбал. Дека Хрватска ќе го освои светското првенство гласаа 23% од гласачите, за Франција 22%.

[poll id=”9″]