Детски олимписки игри: Гостивар влезе во светското олимписко семејство

Основци и младинци членови на спортски клубови од Гостивар денес се натпреваруваат во повеќе спортови во рамки на Детската олимпијада, која се одржува во спортската сала на гостиварското основно училиште „Исмаил Ќемали“. Настанот е во организација на Македонскиот олимписки комитет (МОК) и општина Гостивар, а е дел од светските олимписки активности, кои во текот на денешниот ден се организираат во над 200 градови во сите делови на земјината топка.

Олимпијадата во Гостивар свечено ја отворија градоначалникот Арбен Таравари и претседателот на МОК, Васил Тупурковски.

„Најголеми амбасадори и промотори на еден град и општина се спортистите, научниците и уметниците. Се заблагодарувам на олимпискиот комитет што го избра токму Гостивар за оваа спортска активност, која ќе трае цел ден. Ние како општина ќе правиме напори во периодот што следува да организираме што повеќе спортски настани за младите“, изјави Таравари.

Тупурковски им порача на младите што повеќе да се занимаваат со спорт во интерес на своето психичко и физичко здравје. „Нема подобар начин од спортот за да една личност се исполни целосно. Многу ни е драго што сме денес во Гостивар и се надевам дека таа соработка ќе ја продолжиме и понатаму“, рече тој.

Детските олимписки игри во Гостивар опфаќаат  натпревари во кошарка, одбојка, фудбал, а застапени се и кик бокс и карате спортовите.

Учесниците на Олимпискиот ден имаат можност да се дружат со своите идоли, врвни спортисти, гостиварецот Берат Јакупи, шампион во карате и легендата на македонската кошарка и претседател на КК Гостивар, Перо Антиќ.