Дивоградби во Гостивар: Инвеститор сам си сруши градба, за да не плаќа плус трошоци

Уривањето на дивоградби во Гостивар продолжи денес со рушење на објект кај старото кино. Овојпат, инвеститорот сам го спроведе рушењето, за да ги избегне трошоците кои се наметнуваат доколку тоа го направеше фирмата ангажирана за таа намена од локалната власт.

Општина Гостивар ја започна акцијата за уривање на бесправни градби на својата територија вчера  од населбата Питарница, каде беше срушен ѕид на локација предвидена за улица.

Градоначалникот Арбен Таравари рече дека ќе продолжат со акцијата и при тоа селективност нема да има.

„Прво ги замолуваме самите сопственици да си ја срушат дивоградбата, а ако не го направат тоа тогаш го прави фирмата што ја имаме ангажирано на тендер. Сакам да потенцирам дека не сме селективни, иако вчера бевме обвинувани дека се прави разлика дали сопствениците се Македонци, Албанци, Турци, Роми. За сите ќе бидеме исти.“, изјави градоначалникот.

Тендерот за рушење на дивоградби е тежок 2 милиони денари. За сега е предвидено да се отстранат пет до шест бесправни градби.