Дојде денот – КК Гостивар против КК Работнички во недела

Ден: недела, час: 17:00 место: спортска сала Младост.

После многу години чекање конечно вистинско кошаркарско дерби во Гостивар и тоа какво.. КК Гостивар го пречекува најтрофејниот клуб во државава, моменталниот лидер во првата лига, под водство на Марин Докузовски, едниствениот непоразен тим сезонава, КК Работнички.

За гостиварци ова е повеќе од првенствен меч, долги години без вистинско дерби, сеќавање на минатото, измешани чувства, но се уште е тука желбата да се совлада секој противник. Се најавува вистински спектакл, полна сала, директен пренос на МРТВ и уште едно изненадување од кое дел ќе бидат сите кои ќе присуствуваат во недела во салата. Кошаркарите ветуваат борба до последен атом од силите, храбро се бореа во досегашниот дел од сезоната време е на домашен терен, пред преполни трибини, да падне голем “скалп”, зошто не и најголемиот.

Поддршката од трибините на овој меч на “бело-сините” им е повеќе од потребна. Кошаркарите, тренерот, управата ги повикуваат сите љубители на кошарката од Гостивар, да дојдат и дадат поддршка на овој натпревар.

Кошаркарската треска веќе го тресе Гостивар. Се враќа еуфоријата, неколку дена топ тема на разговор е натпреварот, се почесто по школите, кафулињата, улиците, низ градот може да се слушне “че ги тепаме, че видиш..”