Емилија од Гостивар по оздравувањето од COVID: Сакам да дарувам плазма и да помогнам на други заболени

Во серијата пораки што Министерството за здравство ги објавува последниот период од пациенти кои го победиле коронавирусот, денес се најде пораката од 27 годишната Емилија Јованоска Божиновски од Гостивар, по професија медицинска сестра во ГОБ „8 Септември“.

„Додека траеше моето лекување имав најмногу грижи да не го проширам вирусот на моите најблиски. Како и секој заболен во тие моменти мислев што побрзо да оздравам и да не ми биде полошо. Во првите денови беше потешко, но со терапијата беше подобро, иако психички не беше воопшто лесно. Како здравствен работник, но и како пациент задоволна сум од целиот персонал, особено д-р Ратко Наумоски кој макотрпно се грижи за сите пациенти. Мојата порака како млада девојка, но и како медицинско лице е граѓаните да внимаваат, да водат грижа за своето здравје и да се придржуваат до мерките за заштита. Доколку можам сакам да дарувам конвалесцентна плазма и да помогнам на заболените побрзо да оздрават“, вели Емилија.