Facebook со ново име – Мета

Како што беше најавено претходните денови, Facebook го смени името и сега има ново, а тоа е Мета.

28.10.2021 ќе биде запаметен како голем ден во техно светот. Познатата компанија Facebook го смени името, па така Facebook стана Мета. Шефот и одговорен во Фејсбук, Марк Зукерберг оваа информација ја соопшти синоќа на виртуелната конференција Connect. Иако Зукерберг изјави дека со оваа промена сакаат да започнат некои нови трендови во компанијата, се чини дека ваквата одлука е изнудена, бидејќи Facebook неодамна се соочи со обвинувања за нарушување на приватноста на своите корисници, поттикнување омраза меѓу своите корисници и многу повеќе.

Марк изјавил дека во последните неколку месеци многу размислувал за идентитетот на компанијата и дека се надева дека ова ќе биде паметен потег за иднината на компанијата.

Бидејќи веќе се создаде одредена забуна околу промената на името, треба да се нагласи следново: Facebook како апликација и социјална мрежа останува да постои како Facebook, се менува само името на матичната компанија. Така, Мета сега е сопственик на сите придружни популарни апликации, вклучувајќи ги Facebook, Instagram и WhatsApp.

Целта сега ќе биде поделена на два оперативни сегменти: Семејство на апликации и Reality Labs. Зукерберг наведува дека Мета во иднина ќе се стреми да создаде „метаверс“, кој ќе им помага на луѓето да се поврзат на различни начини и да ги комбинира VR и AR технологиите во целиот „метаверс“.