Гинеколошкото одделение во Гостивар набави современ 4Д ехо апарат за трудниците

Бремените жени од Гостивар повеќе не мора да патуваат во други градови и да се изложуваат на дополнителни трошоци за ехо прегледи  со 4Д технологија. Гинеколошко-акушерското одделение во гостиварската болница набави 4Д ултразвук, современ апарат со кој се откриваат евентуални аномалии кај плодот, уште во раните фази на бременоста.

„За ваков преглед пациентките до сега оделе во Скопје, а сега веќе добиваат можност да го направат овде. Останува лекарите да поминат двонеделна обука за добивање на лиценца, со која се стекнуваме со право да издаваме извештаи со резултати.“, вели раководителот на одделението д-р Агим Јакупи.

Протоколот за водење на бременост налага, скринингот со 4Д да го направи секоја трудница, најмалку два пати во текот на бременоста, во 13-тата гестациска недела и во 22-рата. На приватно овој преглед и услуга чинат околу 2000 до 3000 денари, што не е мала сума за буџетот на младите родители.