Гостивар: Локали работеле по 18 часот, инспекцијата ги затворила, газдите се приведени

Два угостителски објекти добиле забрана за работа, а сопствениците биле приведени поради непочитување на ограниченото работно време.

Како што соопшти СВР, веравечер (27 декември) околу 22 часот и 15 минути, полициски службеници на Одделението за внатрешни работи Гостивар го лишиле од слобода 45-годишниот Ш.Ш. од Чегране, поради тоа што неговиот угостителски објект бил отворен по 18 часот и во него престојувале гости. Тој е задржан во Полициската станица Гостивар, објектот е затворен од Државниот пазарен инспекторат и ќе му биде изготвен поднесок по член 206 од Кривичниот законик.

Околу 20 часот пак, полициски службеници на Одделението за внатрешни работи Гостивар го лишиле од слобода 56 годишниот Д.З. од Гостивар, затоа што во неговиот угостителски објект на улица „Павле Аврамовски“ се наоѓале неколку лица и конзумирале пијалаци. И овој сопственик бил задржан во Полициската станица и против него ќе следува поднесок по член 206 од Кривичниот законик, додека објектот времено е затворен од Државниот пазарен инспекторат.