Гостиварецот Златко Панзов добитник на наградата „Драги“ за најдобар книжевен превод

Наградата „Драги“ за најдобар книжевен превод на македонски јазик ја доби гостиварецот Златко Панзов за преводот од унгарски јазик на „Заробеништво“ од Ѓерѓ Шпиро во издание на издавачката куќа Артконект.

„Златко Панзов успешно се справил со предизвиците на преведувањето и сосема солидно го пренел историскиот, нималку лесен, дискурс во духот на македонскиот јазик. Преводот на ова волуминозно дело, и по обем, и по содржина, несомнено, изискува голем труд, посветеност и истражувачка работа. Дијалозите се спонтани, а драматичното преплетување на историските факти и фикцијата, во симбиоза со психологијата на главниот лик, нудат несекојдневно читателско искуство.“, се вели во Одлуката на Комисијата за доделување на наградата во состав: Јана Михајловска, Лидија Капушевска-Дракулевска и Милан Дамјановски.

Романот „Заробеништво“ од современиот унгарски поет, прозаист, драмски автор и есеист Ѓерѓ Шпиро е мошне комплексен историско-авантуристички роман сместен во времето на Римското царство од добата на Јулио-Клавдиевската династија во 1. век од новата ера. Младиот Евреин Ури, по низа околности, ќе се најде вплетен во клучните настани од тој период и тоа во хронотопската тријада: Рим – Ерусалим – Александрија. Како ликови, во романот, меѓу другите, циркулираат и Калигула, Понтиј Пилат, Исус.

Панзов дипломирал на катедрата на македонска книжевност и јужнословенски книжевности со македонски јазик на Филолошкиот факултет во Скопје. Магистрирал на Институтот за македонска литература, Докторант е на Докторска школа за книжевност Универзитет „ЕЛТЕ“ во Будимпешта. Работи како лектор по македонски јазик на истиот Универзитет. Активно се занимава со книжевен превод од 2005-та година. До сега сам или заедно со Анамарија Цинеге-Панзова, објавиле повеќе од триесет преводи од унгарски јазик.

Доделувањето на наградата за најдобар книжевен превод го организира издавачката куќа „Антолог“ од Скопје