Гостиварецот Бурхан Ахмети со награда од Друштвото на ликовни уметници на Македонија

Уметникот Бурхан Ахмети од Гостивар е еден од годинешните добитници на награда кои ги доделува Друштвото на ликовни уметници на Македонија и Културно информативниот центар во рамки на годишната изложба „Мал формат 2017“.

Изложбата е поставена во Културно информативниот центар во Скопје, а се состои од стотина дела изработени во различни ликовни техники од педесетина домашни автори ,членови на друштвото на ликовни уметници на Македонија.

Освен Ахмети, награди добија и уметниците Драган Ветровски-Алпи, Агрон Абдули,  Силвана Атанасовска и Жаклина Глигориевска-Кочоска.

Академскиот уметник Бурхан Ахмети е роден 1978 година во гостиварско Дебреше. Во артистичката кариера има реализирано бројни самостојни изложби во земјава и во странство. Изложувал во Швајцарија, Америка, Франција, Косово, Бугарија. Учествувал во групни изложби и ликовни колонии. Добитник е на десетина меѓународни и домашни награди за уметност и култура. 

Пред еден месец имаше самостојна изложба во Националната галерија Чифте Амам во Скопје.